Kofradia-Itsas Etxea

Ongi etorri Kofradia-Itsas Etxera, Euskadiko artisau-arrantzari eta itsasbazterreko arrantzari balioa ematen dion proiektura, hain justu.

Kofradia-Itsas Etxeari esker, espezie bakoitzari dagozkion denboraldiak zein diren eta itsasbazterreko euskal arrantza-ontziek zein arrantza-tokitan jardun ohi duten jakingo duzu, Bizkaiko Golkoan gauzatutako arrantza-jarduerarekin lotutako datu eta tekniken eta sektorearen balio-katearekin zerikusia duen guztiaren (arrantzaleak, saregileak, kontserbagileak, lonjak, kofradiak, etab.) berri izateaz gainera. Gainera, hemengo arrantzaleek itsasbazterreko arrantzaren bidez harrapatutako arrainak dastatzera ere gonbidatzen zaitugu.

Proiektua

Euskadiko arrantzale-kofradiek eta Opegui Itsasbazterreko Arrantza Ekoizleen Erakundeak, Kofradia-Itsas Etxea proiektua bultzatu dute. Kofradia-Itsas Etxea Euskadiko itsasbazterreko arrantza sustatzeko eta haren balioa nabarmentzeko sortu zen, eta honako jomuga hauek ditu ezarrita hori lortzeko:

Itsasbazterreko arrantzaren sektorean belaunaldien arteko erreleboa sustatzea, gazteei lan-aukera gisa aurkeztuta, (lanbide moderno, grinatsu eta jasangarri gisa, alegia).
Sektoreari eta gure arrainei loturiko guztiari balioa ematea, kontsumoa bultzatzeko, informazio hau emanez: arrantzatzen duguna, sasoiak, arrantza-aparailuak, arrainak kontserbatzea eta kontsumitzea, eta nutrizio-onurak.

Belaunaldien arteko erreleboa

Gaur egun, belaunaldien arteko erreleboaren erronka estrategikoa lantzen ari gara Izan Arrantzale hezkuntza-programaren bitartez. Hainbat adinetako haur eta gazteei egokitutako edukiak eskaintzen dira (Izan Arrantzale Portuan; Izan Arrantzale Itsasontzi batean; Goazen lonjara!), baita sukaldaritza- eta nutrizio-ikastaroak eta tailerrak ere. 6-17 urteko haur eta gazteentzat daude prestatuta. Udalekuak ere antolatzen ditugu, oporraldietarako, Donostian, Getarian eta Hondarribian.

Gastronomia

Kofradia-Itsas Etxeko gune gastronomikoa Donostiako portuan dago, eta hemengo artisau-flotak arrantzatutako arrainetan funtsatutako proposamena eskaintzen du. Gure sukaldariek produktu freskoa eta kalitatezkoa duten menuak diseinatzen dituzte urte osoan zehar. Produktuaren trazabilitatea (arrantzaletik mahairaino) ezagutzera eman nahi da.

Hedatzea

Proiektuaren funtsezko zatia da, eta arrantza-sektorearen oinarrizko alderdiak ezagutarazten ditu (teknikak, espezieak, itsasontziko bizitza, etab.), ekitaldien, esperientzien, sare sozialen, bideoen, lankidetzen eta komunikabideen medioz.